ကောင်းတဲ့အတိတ်ကိုပဲတွေးပြီး အနာဂတ်နေ့ရက်တွေကိုအကောင်းဆုံးရှင်သန်ဖို့ ဆန္ဒပြုလိုက်တဲ့သားညီ

သားညီကတော့ လက်ရှိအချိန်မှာရုပ်ရှင်သရုပ်ဆောင်တစ်ယောက်အနေနဲ့သာမက ဒါရိုက်တာတစ်ယောက်အနေနဲ့ပါ အနုပညာအလုပ်တွေလုပ်ကိုင်နေသူတစ်ယောက်ပါ။ (၂၀၂၀) ခုနှစ်အတွက် ဒါရိုက်တာတစ်ယောက်အနေနဲ့ “ကမ်း” ရုပ်ရှင်ဇာတ်ကားကို ရိုက်ကူးနေသလို ဒါရိုက်တာဏကြီးရိုက်ကူးနေတဲ့ ” ချစ်ခင်စမှော်ရုံ” ရုပ်ရှင်ဇာတ်ကားကြီးမှာလည်း အောင်ကြီး ကာရိုက်တာနဲ့ ပါဝင်သရုပ်ဆောင်နေသူပါ။

လတ်တလောကိုဗစ်ကာလမှာတော့ အလုပ်တော်တော်များများရပ်နားထားခဲ့ရပြီး ရုပ်ရှင်ရိုက်ကူးရေးတွေလည်း လက်ရှိအချိန်ထိပြန်မစနိုင်သေးပါဘူး။ သားညီကတော့ (၂၀၂၀)ခုနှစ် နှစ်ဝက်ကျိုးသွားတဲ့အချိန်မှာဖြစ်ပေါ်လာတဲ့ သူ့ရဲ့ခံစားချက်တချို့ကိုမျှဝေခဲ့ပါတယ်။ “နှစ်တစ်ဝက်ကျိုးသွားခဲ့ပြီ… ပြီးခဲ့တဲ့ ခြောက်လတာ ကာလမှာ… ဒုတိယ သုံးလ လုံးလုံး ဘာအလုပ်မှမရှိပဲ ငုတ်တုတ်ထိုင်နေခဲ့ရတယ်…. စိတ်ဓါတ်တွေကျနေခဲ့ရတယ် …ဒါပေမယ့် ပထမသုံးလတာကာလမှာ…. ဒါရိုက်တာအနေနဲ့ ရုပ်ရှင်တစ်ကား… သရုပ်ဆောင်အနေနဲ့ ရုပ်ရှင်တစ်ကားရိုက်ခွင့်ရခဲ့ပါတယ် … အရည်အတွက်နည်းပေမယ့် ကိုယ်ရိုက်ချင်တာရိုက်ခွင့်ရခဲ့တယ်… ကိုယ်သရုပ်ဆောင်ချင်တဲ့ပုံစံအတိုင်း လုပ်ခွင့်ရခဲ့တယ် …

ကျွန်တော်တို့မှာ စိတ်ညစ်စရာ အတိတ်တွေရှိခဲ့သလို … ပြန်တွေးလိုက်တိုင်း အားရကျေနပ်နေရတဲ့ အတိတ်တွေလည်းရှိခဲ့ဖူးပါတယ် … ဘယ်အတိတ်ကို တွေးမလဲဆိုတဲ့ မိမိရဲ့ရွေးချယ်မှုကသာ အဓိကပါ …အဲ့တော့ စိတ်ဓါတ်တက်ကြွစရာ အတိတ်တွေကိုပဲပြန်စဉ်းစားရင်း နောက်လာမယ့် နေ့ရက်တွေအတွက် အကောင်းဆုံး ပြင်ဆင်နေထိုင် ကြရအောင်ဗျာ …မုန်တိုင်းပြီးရင်တော့ လေပြေ လာကိုလာမှာပါ” ဆိုပြီး သူ့ရင်ထဲကယုံကြည်ချက်တချို့ကို မျှဝေခဲ့ပါတယ်။ အခုလိုအချိန်မှာတော့ အလုပ်တွေရပ်နားခဲ့ရလို့ လူတော်တော်များများအဆင်မပြေဖြစ်နေပေမယ့် သားညီကတော့ ပျော်စရာအတိတ်ကိုပဲ တွေးပြီး အနာဂတ်နေ့ရက်တွေကိုရှေ့ဆက်ဖို့ ပရိသတ်တွေကို ဆန္ဒပြုခဲ့တာပဲဖြစ်ပါတယ်။


Source – Thar Nyi
Rainbow- Cele Gabar